​​​​​ໃນຕອນເຊົ້າ​ວັນ​ທີ 5 ສິງຫາ 2021 ນີ້ ຢູ່ທີ່​ຫ້ອງ​ປະຊຸມ​ພະແນກເຕັກໂນໂລຊີ ແລະ ການສື່ສານ ​ແຂວງ​ບໍລິ​ຄຳ​ໄຊ, ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ ​ພ້ອມດ້ວຍ​ຄະນະໄດ້​ລົງຢ້ຽມຢາມໂອ້​ລົມ​ພະນັກງານ ພະແນກເຕັກໂນໂລຊີ ​ແລະ ການ​ສື່ສານ ​ແຂວງ​ບໍລິ​ຄຳ​ໄຊ ພາຍຫຼັງປະກາດປ່ຽນຊື່ມາເປັນພະແນກ ເຕັກໂນໂລຊີ ແລະ ການສື່ສານ ໃນວັນທີ 23 ກໍລະກົດ 2021 ທີ່ຜ່ານມາ. ​ເຂົ້າ​ຮ່ວມ​ຮັບ​ຟັງ​ການ​ໂອ້ລົມ​ຄັ້ງ​ນີ້ ມີ​ທ່ານ ​ລັງສີ ແກ້ວວິເສດ ຫົວໜ້າ​ພະ​ແນ​ກເຕັກໂນໂລຊີ ແລະ ການສື່ສານ ​ແຂວງ, ມີ​ຄະນະພະແນກ, ພ້ອມດ້ວຍພະນັກງານ​-ລັດຖະກອນ​​ ພະ​ແນ​ກ ຕສ ​ແຂວງ ​ແລະ ບໍລິສັດ​ໄປສະນີ, ​ໂທລະ​ຄົມມະນາຄົມ ​ພາຍ​ໃນ​ແຂວງ​ເຂົ້າ​ຮ່ວມ​.

ໃນວັນທີ 23 ກໍລະກົດ 2021 ທີ່ຜ່ານມານີ້; ຢູ່ທີ່ຫ້ອງປະຊຸມເບີ 3 ຂອງຫ້ອງວ່າການປົກຄອງແຂວງ ແຂວງບໍລິຄຳໄຊ, ໄດ້ຈັດພິທີປະກາດການປ່ຽນຊື່ພະແນກໄປສະນີ, ໂທລະຄົມມະນາຄົມ ແລະ ການສື່ສານ ມາເປັນພະແນກເຕັກໂນໂລຊີ ແລະ ການສື່ສານ ແລະ ປະກາດແຕ່ງຕັ້ງຫົວໜ້າ ແລະ ຮອງຫົວໜ້າພະແນກເຕັກໂນໂລຊີ ແລະ ການສື່ສານ ແຂວງບໍລິຄຳໄຊ, ພາຍໃຕ້ການເປັນປະທານຂອງທ່ານ ວັນວິໄລ ແດນພູຫຼວງ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ, ມີບັນດາຕາງໜ້າຈາກພະແນກການທີ່ກ່ຽວຂ້ອງຂັ້ນແຂວງ, ເມືອງ, ສຳມະຊິກພັກ, ພະນັກງານພາຍໃນພະແນກການ, ຕາງໜ້າອົງການຈັດຕັ້ງທີ່ກ່ຽວຂ້ອງເຂົ້າຮ່ວມ.

ຕອນເຊົ້າວັນທີ 21 ເມສາ 2021 ນີ້ ຢູ່ທີ່ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊບໍລິສັດ ຢູນິເທວ ສາຂາ ແຂວງບໍລິຄຳໄຊ ໄດ້ນຳເອົາຄອມພິວເຕີຕັ້ງໂຕະ ຈຳນວນ 1 ເຄື່ອງ ລວມມູນຄ່າ 3.950.000 ມາມອບໃຫ້ພະແນກ ປທສ ແຂວງບໍລິຄຳໄຊ ກ່າວມອບໂດຍທ່ານ ນາງ ດາວວອນ ເພັດສານຸພົນ ອຳນວຍການ ບໍລິສັດ ຢູນິເທວ ສາຂາ ແຂວງບໍລິຄຳໄຊ, ກ່າວຮັບໂດຍທ່ານ ລັງສີ ແກ້ວວິເສດ ເລຂາຄະນະພັກຮາກຖານ ຫົວໜ້າພະແນກ ປທສ ແຂວງບໍລິຄຳໄຊ ພ້ອມຄະນະ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນຕອນເຊົ້າວັນທີ 6 ເມສາ 2021 ທີ່ຜ່ານມານີ້, ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງບໍລິຄຳໄຊ ໄດ້ຈັດຕັ້ງການເຜີຍແຜ່ເຊື່ອມຊືມເອກະສານທີ່ສຳຄັນ ຈຳນວນ 4 ເອກະສານຄື: 1) ຄຳສັ່ງຂອງຄະນະປະຈຳພັກແຂວງ ສະບັບເລກທີ 244/ຄປພ.ຂບຊ, ລົງວັນທີ 22 ມີນາ 2021 ກ່ຽວກັບການກະກຽມ ແລະ ສະຫຼອງບັນດາວັນສຳຄັນປະຫວັດສາດລະດັບຊາດ ປີ 2021; 2) ຄຳແນະນຳ ຂອງເຈົ້າແຂວງ ສະບັບເລກທີ 03/ຂບຊ, ລົງວັນທີ 22 ມີນາ 2021 ກ່ຽວກັບການກະກຽມສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 60 ປີ; 3) ແຈ້ງການແນະນໍາຄະນະກວດກາພັກແຂວງ ສະບັບເລກທີ 187/ຄກພ.ຂບຊ, ລົງວັນທີ 23 ມີນາ 2021 ກ່ຽວກັບການສະເຫຼີມສະຫຼອງ ແລະ ປາຖະກະຖາມູນເຊື້ອວັນສ້າງຕັ້ງອົງການກວດກາພັກ-ລັດ ສປປ ລາວ ຄົບຮອບ 39 ປີ; 4) ແຈ້ງການແນະນຳຂອງຄະນະຈັດຕັ້ງແຂວງ ສະບັບເລກທີ 180/ຄຈ.ຂບຊ, ລົງວັນທີ 4 ມີນາ 2021 ກ່ຽວກັບການປະກອບເອກະສານເຂົ້າພັກ. ໃຫ້ກຽດເຜີຍແຜ່ເອກະສານໃນຄັ້ງນີ້ມີທ່ານ ລັງສີ ແກ້ວວິເສດ ເລຂາຄະນະພັກຮາກຖານ ຫົວໜ້າພະແນກ ປທສ ແຂວງ ແລະ ທ່ານ ຫົງວິໄລ ຈຸນລະມົນຕີ ຮອງເລຂາຄະນະພັກຮາກຖານ ອຳນວຍການບໍລິສັດ ລາວໂທລະຄົມມະຫາຊົນ ສາຂາແຂວງບໍລິຄຳໄຊ, ມີຄະພັກຮາກຖານ, ມີຄະນະໜ່ວຍພັກຂື້ນກັບ ແລະ ຕາງໜ້າຄະນະກວດກາພັກ ແຂວງເຂົ້າຮ່ວມ.